Blog #5 :: Anton :: Ang Paghahanga ng Binatang si Carmelo Sabitsana sa Dalagang si Nikki Gil

“Ang Paghahanga ng Binatang si Carmelo Sabitsana sa Dalagang si Nikki Gil”

Ang blog entry na napili kong suriin at bigyan ng reaksyon ay ang blog entry ukol kay Nikki Gil ng matalik kong kaibigan na si Melo Sabitsana na bahagi ng group#3 ng ating klase. Sino nga ba si Nikki Gil at bakit nahuhulog ang puso ng mga binata sa dalagang ito? Ayon sa kaibigan kong si Melo ang tanging katangian ni Nikki Gil na kanyang hinahangaan ay ang galling nito sa pagkanta. Alam na nating lahat na unang sumikat ang dalaga sa kanyang 30 second na komersyal para sa Coca-Cola.

Noong unang lumabas ang komersyal na ito, naakit ang mga tao sa misteryosang dalagang may magandang boses at tila magandang mukha. Kung susuriin ang astetika ng kagandahan ni Nikki Gil, masasabi natin na hindi siya naaayon sa kinikilala ng masang Pilipino na imahe ng kagandahan. Siya ay maliit, morena ang balat at tila mukhang napakabait na tao. Nakikita ko naman kung bakit nahuhulog ang puso ng aking kaibigan sa dating ni Nikki Gil. Siya ang tipo ng babae na puwedeng iuwi sa mga magulang, mukhang mabait, at magaling pang kumanta. Kung tatanungin mo si Melo, ito ang mga katangian na hinahanap niya sa isang babae. Ika nga para sa kanya si Nikki Gil ang maituturing na “perfect girl” sa kanyang mga mata.

Bilang bahagi ng mga kinakailangan sa blog entry na ito, nais kong suriin ang kabuuang ayos ng blog entry. Kung bibigyan ng pansin ang kaalaman ng manunulat ukol sa kanyang paksa, masasabi kong maraming alam ang manunulat tungkol sa dalagang si Nikki Gil. Siya ay nakapagbigay ng iilang mga proyekto kung saan kasapi ang dalaga. Natala niya rin sa kanyang blog entry ang mga samut-saring komersyal kung saan si Nikki Gil ang nagsilbing endorser. Dahil sa mga impormasyon na kanyang binigay makikita natin na may ginawang research ang manunulat bago pa man siya magsulat ukol sa kanyang paksa.

Kung susuriin naman ang “approach” o pag-atake ng manunulat sa entry makikita natin ang pagka-personal na dating ng pagsusulat niya sa partikular na entry na ito. Kung aalahanin ang mga panuto na ibinigay para sa entry na iyon, pinapili tayo ng isang artista o taong sikat at suriin ang imahe na pinapakita nito sa lipunang Pilipino. Maliwanag naman at klaro ang pagpapaliwananag ng manunulat sa nakikita niyang imahe ni Nikki Gil. Masasabi ko rin na ang kanyang mga paglalarawan ay patok sa aking nakikita kay Nikki Gil sa industriya ngayon. Ang imahe ni Nikki Gil ay tila “conservative” na babae, masasabi ko rin na pandagdag na si Nikki Gil ay isang manifestation ng konseptong “girl next door” sa ating bansa. Makikita naman natin ang personal na dating ng pagsulat ni Melo dahil matagal na siyang may crush sa srtista/singer na si Nikki Gil. Naranasan ko ng marinig ang aking kaibigan na ipahayag ang kanyang paghahanga para sa magandang dalaga.

Sa tingin ko rin ay naging kalakasan ng blog entry ay ang paglalarawan ng manunulat sa mga firsthand niyang karanasan sa pagpanood kay Nikki Gil. Dahil sa mga bahaging ito lalong nabigyan diin ang papel ni Nikki Gil hindi lang sa buhay ng manunulat kundi sa ang kanyang papel bilang isang mangaawit. Dahil sa mga karanasan na inilarawan ni Melo, nagkakaroon ang mambabasa ng mas maliwanag na kaalaman ukol sa paghahanga ng manunulat sa dalaga. Dahil din dito ang blog entry ay nagkakaroon ng kakaunting elemento ng komedya dahil sa mga pangyayari.

Kung titignan ang porma ng pagkasulat ay masasabi kong maayos naman ito maliban sa iilang typographical errors na aking nakita at iba ring grammatical errors. Hindi naman din maiiwasan sa pagsusulat ng blog na maghalo ng wikang Ingles at Filipino o di kaya’y gumamit ng taglish. Sa aking opinyon nagiging mahina ang isang teksto kapag ganitong klaseng panunulat ang ginawa, at hindi ako nagmamalinis dahil kung minsan ay ganito rin ako magsulat. Mahirap ang ipahayag ang na sa utak o damdamin sa wikang Filipino kung ang nakasanayan mo ay mag-isip sa wikang Ingles.

Sa kabuuan, masasabi ko na natuwa ako sa blog entry na ito na aking nabasa. Kung mayroong mga bias man ang aking mga pananaw ay hindi na ito maiiwasan dahil sa pagkakilala ko sa binatang humahanga sa dalagang si Nikki Gil. Makikita sa pagsulat ni Melo na siya ay may matinding paghahanga, pagpapahalaga, at pagpupuri para kay Nikki Gil. Kaninang umaga nga lang sa bus papuntang eskwelahan ay sinabi niya sa akin n a nadownload niya na daw at nakasa sa kanyang ipod ang mga kanta ni Nikki Gil mula sa kanyang album.